བསྟན་འཛིན་བསད་པའི་གྱོད་གཞི། བཙན་བྱོལ་ནང་སྐྱེས་པའི་ན་གཞོན་ཞིག་གིས་བགྱིས་པའི་བརྩམས་སྒྲུང་།

ངས་ངོས་ནས་བལྟས་ན། ན་གཞོན་བསྟན་འཛིན་གྱི་བརྩམས་ཆོས་དེས་བརྡ་ལན་གསལ་པོ་གཉིས་བཏང་སོང་སྙམ་སྟེ། གཅིག་ནི་རྗེས་འབྱོར་བ་ཚོས་བཙན་བྱོལ་ནང་སྐྱེས་པ་ཞིག་ལ་བོད་ཡིག་ཤེས་ཀྱི་མིན་འདུག་ཅེས་འཁང་ར་དང་སྣང་ཆུང་དེར་མི་བདེན་པའི་ར་སྤྲོད་གསལ་པོ་ཞིག་རེད། ཁོ་པ་བཞིན་དགེ་རྒན་ཚད་ལྡན་དུ་མས་བསྐྱངས་ཡོད་ན་སུས་ཀྱང་བོད་ཡིག་ཤེས་ལོས་ཐུབ། སྐབས་རེས་རྗེས་འབྱོར་བ་བོད་ཡིག་ཤེས་རློམ་ཅན་ནམ་མུ་ཅོར་སྒྲོག་མཁན་ཡང་འདི་ལྟའི་བརྩམས་ཆོས་འདོན་རྒྱུ་ཕར་བཞག་ཡིག་ཕྲེང་འགའི་ནང་ཡང་ཡིག་ནོར་གྱིས་ཁེངས་པ་མཐོང་རྒྱུ་འདུག་ག གཉིས་པ་ནི་དཔེ་སྟོན་སློབ་གྲྭར་འཛིན་ཚུལ་ཞན་པ་སྟེ་དབྱིན་ཡིག་ཐོག་རྗེས་ཟིན་ཐུབ་མིན་སྐོར་དོགས་པ་ཡོད་མཁན་ལ་སྟེ། བསྟན་འཛིན་རང་གིས་བརྗོད་པར་ཁོ་པས་སྒྲུང་དེ་དབྱིན་ཡིག་ཐོག་འབྲི་ཐུབ་པའི་གནས་ཚད་ཡོད་པ་ལས་སུན་འབྱིན་དེ་ལྟར་སྣང་ཁོ་ནའོ།།